انا ماشي/بقلم محمد بدوي

أنا ماشى
*********
وداع يامصر دلوقتى
ماشى وسايب هنا قلبى
وكل وأعز ما أملك
سايبهم أمانه ف رقبتك
كل اللى عرفنى وعرفته
وأمى اكتر حد حبيته
خدى بالك منها ووديها
وأوعى تنسينى وتنسيها
أنتى اللى من بعدى باقيالها
وأوعى تهملى فيها
كل اللى عرفنى وعرفته
صديق زميل حبيب صاحب
أو أى حد كلمته
انا ماشى وعن ترابك هاكون غايب
وانتى الوحيده اللى عليهم بعد المولى أمنته
وداع يامصر وكلها ساعه أو ساعتين
انا ماشى ومش عارف ليه عايش ف قلبى أنين
وحاسس إنى خلاص ميت وهاتكفن كمان ساعتين
مش عارف ايه المكتوب واللى هاشوفه بنن العين
أنا ماشى ومن جسمى أنا مهاجر
وم الدنيا كلها مسافر
ومش عارف هتفضل روحى سكنانى
وآلا مابقتش عاوزانى
وآلا ناويه الرحيل عنى
وناويه تروح وتهجرنى
أنا ماشى ومعرفشى
مكتوبلى أرجع وآلا ما أرجعشى
أنا ماشى ...  وخليكى بس فاكرانى
وإن غبت ... أوعى أرجع الاقيكى نسيانى
ف الغربه هاموت فيها وحدانى
إفتكرى شكلى وأوصافى
انا لسه ادامك ومتعافى
وأوعى يامصر .. أموت بره وتنسينى
إبعتى هاتينى وضمينى
يمكن ما أحسش أنا بضمك ...  لكن أنتى حسينى
وضمينى أوى لصدرك
يامصر ف الأخر وف الأول أنا إبنك
ومهما أتغرب بردوا محتاجلك
واوعى يقولولك إبنك مات ومتكفن
ومحتاج يندفن فيكى هناك عندك
أوعى تقولى مش عاوزانى أو ربنا يحنن

م/محمد بدوى أبوالعلا